Այսօր «Էլ Էս Էյ» փաստաբանական գրասենյակի (Էդգար Այվազյանի) վստահորդ, սպանության համար դատապարտված Դ. Հ.-ն պայմանական վաղաժամկետ ազատ արձակվեց դատարանի դահլիճից։
Նման դեպքերը վստահություն են ներշնչում, որ Հայաստանի Հանրապետության դատապարտյալների վաղաժամկետ ազատման ինստիտուտներն ու կառուցակարգերը սկսել են արդյունավետ գործել, և դատապարտյալը իր վարքագծով կարող է կանխորոշել իր վաղաժամկետ ազատման հեռանկարը։
Մեր վստահորդ Դ. Հ.-ն հանցագործությունը կատարել էր 19 տարեկան հասակում՝ զինվորական ծառայության պայմաններում։ Առաջին իսկ օրվանից նա խոստովանական ցուցմունք էր տվել և աջակցել գործի քննությանը։ Անազատության մեջ անցկացրած 7.5 տարիների ընթացքում նա մասնակցել է բազմաթիվ մշակութային և սոցիալական միջոցառումների, աշխատել, ընդունվել և սովորել իրավաբանական ֆակուլտետում (որը մայիսին ավարտում է), ինչպես նաև բազմիցս խրախուսվել է քրեակատարողական ծառայության կողմից։ Նա միջոցներ է ձեռնարկել տուժողի ընտանիքին աջակցելու համար։
Թե՛ քրեակատարողական ծառայությունը, թե՛ պրոբացիայի ծառայությունը հանդես եկան օբյեկտիվ դրական եզրակացությամբ, ինչի համար շնորհակալություն ենք հայտնում նրանց։ Չնայած դատախազությունը, իր սովորության համաձայն, ջանք չէր խնայում այս զեկույցները արժեզրկելու և Դ. Հ.-ին անազատության մեջ պահելու համար, ՀՀ Կոտայքի մարզի առաջին ատյանի ընդհանուր իրավասության դատարանի դատավոր Արշակ Հարությունյանը արդարացի և պատճառաբանված դատական ակտով Դ. Հ.-ին վերադարձրեց տուն։
